И.Н.Ульянов ячӗллӗ Чӑваш патшалӑх университечӗ валли ҫӗнӗ проректор тупӑннӑ. Вӑл – унччен Тӗп суйлав комиссийӗн председателӗ пулнӑ Александр Цветков.
51 ҫултискер Тӗп суйлав комиссийӗн икӗ составне ертсе пынӑ. Пӗлтӗр раштав уйӑхӗнче ӑна ку должноҫе суйламан. Халӗ вӑл – ЧПУ проректорӗ.
Александр Иванович Шупашкарта 1971 ҫулта ҫуралнӑ. 1996 ҫулта И.Н.Ульянов ячӗллӗ ЧПУна пӗтернӗ. Иртнӗ ӗмӗрӗн 90-мӗш ҫулӗсенче председатель ҫумӗ, ЧПУн студентсен канашӗн председателӗн ҫумӗ пулнӑ. Кайран та унтах ӗҫленӗ: юрисконсульт, юридици пайӗн пуҫлӑхӗ пулнӑ, ытти должноҫре ӗҫленӗ.
Шупашкарти Олимп резервӗн 6-мӗш спорт шкулне директор кирлӗ. Кун пирки республикӑн Спорт министерстви пӗлтернӗ.
Директор пулмалли конкурса хутшӑнас кӑмӑллисен докуменчӗсене ҫурла уйӑхӗн 12-26-мӗшӗсенче ирхи 8 сехетрен пуҫласа 12 сехетчен, 13 сехетрен пуҫласа 17 сехетчен Шупашкарти Президент бульварӗнчи 17-мӗш ҫуртри 712-мӗш пӳлӗмре йышӑнаҫҫӗ.
Ыйтса пӗлмелли телефон номерӗсем ҫапларах: 56-52-60, 56-52-57; e-mail: sport@cap.ru, www.sport.cap.ru.
Паян, ҫурла уйӑхӗн 12-мӗшӗнче, Чӑваш Ен Правительствинче кадрсемпе ҫыхӑннӑ йышӑну тунӑ. Республика ертӳҫи Олег Николаев физкультурӑпа спорт министрӗн ҫумӗ пулма Алексей Чернова ҫирӗплетнӗ.
Паянхи куна илсен, Василий Петров министрӑн заместителӗсем виҫҫӗн: Татьяна Рябинина — пӗрремӗш ҫум, Ольга Смирнова — министр ҫумӗ тата финанспа экономика пайӗн пуҫлӑхӗ, виҫҫӗмӗш ҫум — паянтан ӗҫе кулӗннӗ Алексей Чернов.
ЧР Элтеперӗ Олег Николаев цифра министрӗн ҫумӗ пулнӑ Юлия Стройкова валли ҫӗнӗ ӗҫ вырӑнӗ тупса панӑ. Вӑл халӗ – пресс-служба тата протокол администрацийӗн управленийӗн пуҫлӑхӗ. Ҫак должноҫ юлашки вӑхӑтра пушӑ пулнӑ.
Аса илтерер: Юлия Стройкова малтан Чӑваш наци телерадиокомпанийӗн директорӗн ҫумӗнче вӑй хунӑ. Кайран цифра министрӗн ҫумӗнче 2016 ҫулхи ҫӗртмен 1-мӗшӗнченпе ӗҫленӗ. Нумаях пулмасть, ҫурла уйӑхӗн 4-мӗшӗнче, ӑна ку должноҫрен кӑларнӑ.
Чӑваш Енӗн Цифра аталанӑвӗн, информаци политикин таиа массӑллӑ коммуникацисен министерствинче кадр улшӑнӑвӗ пулса иртнӗ.
Паян, ҫурла уйӑхӗн 4-мӗшӗнче, министр ҫумне Юлия Стройковӑна ӗҫрен кӑларнӑ. Документа республика ертӳҫи Олег Николаев алӑ пуснӑ.
Юлия Стройкова министр заместителӗн пуканне 2015 ҫулхи ҫӗртме уйӑхӗн пуҫламӑшӗнче йышӑннӑччӗ.
Паян, ҫурла уйӑхӗн 3-мӗшӗнче, Чӑваш Ен Элтеперӗ Олег Николаев Усламҫӑсен правине хӳтӗлес енӗпе ӗҫлекен уполномоченнӑя ӗҫрен кӑларса ӗҫе илнӗ.
95-мӗш номерлӗ хушура ӑнлантарнӑ тӑрӑх, бизнес-омбудсменӑн ӗҫ вӑхӑчӗ тухнӑ. Ӗҫ вӑхӑтне малалла тӑсас тесен ҫӗнӗ хушу кӑларма тивнӗ.
Ҫапла вара Александр Рыбакова паян ӗҫрен кӑларса паянах ӗҫе илнӗ.
Шупашкар хула администрацийӗн ҫурт-йӗрпе коммуналлӑ хуҫалӑх тата хӑтлӑх кӗртекен управленийӗнче ҫӗнӗ директора ҫирӗплетнӗ. Унчченхи пуҫлӑх пӗр-ик кун тимленӗ те пӗр вӑхӑт больница хучӗпе ларнӑ, унтан пӑрахса кайнӑ.
Управлени пуҫлӑхӗ пулма халӗ Павел Чернышева шаннӑ. Вӑл кӑҫалхи нарӑс уйӑхӗнченпе асӑннӑ тытӑмра директор ҫумӗ, тӗп инженер пулса тӑрӑшнӑ. Унчен тӑватӑ ҫул Шупашкар хула адмнистрацийӗн Калинин район администрацийӗнче, Ҫӗнӗ Шупашкар тата Шупашкар хулисен администрацийӗсенче тӑрӑшнӑ.
Республика Правительствинче утӑ уйӑхӗн 20-мӗшӗнче улшӑну пулса иртнӗ. Чӑваш Енӗн Сывлӑх сыхлав министерствинче яваплӑ должноҫре Владимир Гладнев ӗҫлеме тытӑннӑ. Владимир Юрьевича министрӑн пӗрремӗш ҫумӗ пулма шаннӑ.
Владимир Гладнев ятлӑ ҫын, сӑмах май каласан, нумаях пулмасть Росздравнадзорӑн Мари Элти уйрӑмне ертсе пынӑ.
Владимир Степанов министрӑн паянхи куна илсен тепӗр икӗ заместитель пур. Вӗсем — Ирина Левицкая тата Сергей Тоцкий. Министр пулӑшуҫи пулса Татьяна Михайлова тӑрӑшать.
Чӑваш патшалӑх филармонийӗн директорӗ пулма Максим Матросова шаннӑ. Йышӑнӑва республика ертӳҫи Олег Николаев ӗнер, утӑ уйӑхӗн 12-мӗшӗнче, алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.
Филармонире илемлӗх ертӳҫи пулса Николай Казаков тӑрӑшать.
Максим Юрьевичӑн заместителӗсем иккӗн: Татьяна Фролова пӗтӗмӗшле ыйтусемпе ӗҫлет, Ирина Фролова – экономика тата финанс енӗпе.
Етӗрне районӗнче прокурор пуканне ҫӗнӗ ҫын йышӑннӑ. Вӑл - Вадим Захаров.
2017 ҫултанпа ку должноҫе Юрий Фуражников йышӑннӑ. Вадим Захарова ку тивӗҫе 5 ҫуллӑха шанса панӑ.
Вадим Юрьевич 1982 ҫулта Волгоград облаҫӗнче ҫуралнӑ. 2004 ҫулта Шупашкарти право тата управлени академийӗн юридици факультетне пӗтерсен Муркаш районӗн прокурорӗн пулӑшуҫи пулнӑ. Кун хыҫҫӑн вӑл ӗҫ вырӑнне темиҫе те улӑштарнӑ, Мари Элта та ӗҫленӗ.
+19.8 °C